Bir müntəhir şəkli gördüm
o gün xəbərlərdə
elə bildim mənəm, qorxdum.
Sonra bir qatil şəkli gördüm
mənə yaman oxşayırdı zalımoğlu.
Güzgüyə baxmadım.
Bu gün bir məqtul şəkli gördüm
sonra bir məcnun şəkli
sonra bir məfqud şəkli.
Hamısı mənə oxşayırdı qırılmışlar.
Özümü görmədim
özümdəkini gördüm
özgə şəkillərdə.
Görəsən, sabah kimi görərəm?
Amma mən görməsəm
kimsə görsün.
Xahiş eliyirəm.
* müntəhir – intihar etmiş şəxs
* məqtul – qətl edilmiş şəxs
* məfqud – qeybə çəkilmiş, öldüsü-qaldısı bilinməyən, itkin şəxs deməkdir.
