Və Tanrı şahiddi ki…
Və Tanrı şahiddi ki, səni unutmamışam
Barmağının ucundan dodaqlarına kimi..
Saçlarının qoxusun, əllərinin istisin
Sayaram bir-bir sənə
Hər sözündə neçə ah, neçə köks ötürmə var
Sayaramee istəsən..
Və Tanrı şahiddi ki, o gün bu gündü təkəm
Tək deyirəmee sənə..
Bürünüb yalnızlığın məsumiyyət rənginə
Bozam, siyaham.. azam
Gəlsən gözüm üstəsən..!
Və Tanrı şahiddi ki, kimsəyə toxunmadım
Sənə toxunmadığım tək
Əl-əl, saç-saç yox oldum..
Bəzən hamıya döndüm, bəzən birdən çox oldum
Dağıldım yerə-göyə, özümü söyə -söyə
Dizimə döyə döyə…
Dedilər ki “xəstəsən..”
Və Tanrı şahiddi ki, sonsuzluğa dönüşdün
Bəlkə də bu dünyaya say olmağa gəlmişdin
İki, üç və sairə, yüz yuvarlaq dairə
Ən böyük ortaq bölən..
Məndimeee mən qarabəxt, məndim dərdindən ölən
Saatın, ayın, ilin,
Sən zamanın üstəsən..!
Və Tanrı şahiddi ki, yuxuma dərman qatıb
Gətirmişəm ki ölüm..
Ölümü qatar-qatar ötürmüşəm ki.. ölüm
Ən yüksək mərtəbədə ev tutmuşam ki.. ölüm
Bax anama and olsun sağalmışam ki ölüm..
Sən kefini pozma ha..
Deməsinlər yastasan.
Və Tanrı şahiddi ki, səndən sonra olmadı
Titrəmələr falanlar
40 yaşında doğrular, 3 yaşında yalanlar..
Sən məni anlamazsan, danışsam nə fərqi var
Amma yalan nə deyim..
Amma gəl..! Gəl gör ki var.
Sən ümidin qatili, sən arzunun cəlladı
Sən getməyə ustasan..
Və Tanrı şahiddi ki, səndən sonra öldü ee
Güvən də, etibar da
Nəyim vardısa təmiz, nəyim vardısa məsum
Qalmışdı o bahar da..
Elə bildim sən təksən və belə qalacaqsan
Mənim gözümdən düsüb, mən də doğulacaqsan
Deyirdim ki.. olmaze bir də belə məhəbbət
Hec kimdə tapmadığım əlin, gözlərin, səsin..
Səpilibee aləmə..
Sən indi hər adamda sən indi hər kəsdəsən!
Və tanrı şahiddi ki..
Unudaram.. istəsəm.
***
Bir bilet alasan ona çatsan
Baxa gözlərinə deyə “hardasan?”
Susasan.. Soyuqdan tir-tir
Əsəsən..
Öpəsən, öpəsən
Sözün kəsəsən..
Dönəsən başına elə dönəsən
Qayıtdığı yerdə, döndüyü yerdə
(Dönəsən başına elə dönəsən,
Heç belə dönməyib Günəşə Yer də..)
“Darıxdım” deyəsən gülə sözünə
Bağrın çat-çat ola, dilin tutula
Darıxdım deyəsən..
Bu darıxmaqda
Gözlərin həbs ola əlin tutula..
(Çıxa axırına göz baxa- baxa
Ürəyinə girə, ağlında qala)
Kişisən ağrıdan qıvrılma indi
Kişisən.. ağrıma, döz baxa-baxa.
(Düşəsən dünyanın ən pis gününə
Xərçəng taleyinə, ilan ilinə)
Diz çöküb deyəsən
“Bağişla məni”
Bağişla, bağışla məni əlinə..
Qəfil ürəyinin sancısı tuta
Ona nəfəsini qurban kəsəsən
Yara nəfəs nədi, yara səs nədi?
Ümidi kəsəsən, əli kəsəsən..
Ümiddə, arzuda birdən çox ola
Bir sürü kəsəsən, karvan kəsəsən..
Bir bilet alasan, Yara çatasan..
Deyəsən: -Gəlmişəm,
deyim.. gedirəm
Deyim ki “sevgilim, deyim ki yarım
Belə nənəm demiş “qadam” bağişla!
Qanıma qırmızı,gözümə işıq
Ruhuma can verən
Adam bağ-ışla!
***
Sən gedərsən arxanca,
sallanıb qalar qolum.
Başımdan örpək düşər,
dodağımdan “Sağ ol”um.
İçim içimi yeyər,
çölüm doymaz özümdən.
Səni daşıyan gəmi
uzaqlaşar gözümdən.
Bir qağayı səsiylə
dəniz danışar, dinər.
Dalğalar mənə gələr
yenə də sənə dönər…
Mən də çəkib gözümü ,
mən də üzüb əlimi
Bilərəm daha yoxsan…
Görüşərik, Kapitan!
Nə limanlar qocalar,
Nə insanlar yorular.
Yenə kimsə qayıdar,
Kimlərsə unudular.
Göz yaşı ayrılıqlar
İntiharlar dənizi.
Gəmilər qovuşdurar,
Sonra ayırar bizi
Sən də çıx göyərtəyə
Bax dənizə darıxsan,
Görüşərik, Kapitan!
Bu necə təsəllidi,
Bu nə biçim yalandı?
Sən görüşərik dedin,
Ürək həmən inandı…
Bilirdim o yolların
Geri dönüşü olmur.
Bilirdim balıqların
Sahildə işi olmur.
Mən yenə də inandım
Baxıb güldüm üzünə
Pıçıldadım astadan
Görüşərik, Kapitan!
Bu dəniz dəli dəniz,
Göz yaşımdan duz alar.
Hər gedənin ardından
Dəniz bir az azalar…
Oxumaz qağayılar
Yaddan çıxar balıqlar.
Gedən gedər… Qayıdan –
Bir gəmi darıxmaqlar…
Belə olmur ayrılıq…
Belə getməzlər, Adam…
Görüşərik, Kapitan!
Səndən sonra neynəyim?
Hara gedim bu gündə?
Dəniz mənim içimdə
Mən dənizin içində.
Öldürüm balıqları,
Qırım qağayıları.
Dənizə yas saxlayım
Hər ilin may ayları…
Deyim, ay atam dəniz,
Anam, bacım, qardaşım,
Dostumdun…Utan dəniz!!!
Bir qız asıb özünü
Kəndiri yosunlardan.
Xəbərdə verəcəklər,
Aç TV-ni birazdan…
Görüşərik, Kapitan!
***
Səni kimə tapşırım, səni harda gizlədim?
Səni necə axtarım, səni harda gözlədim?
Bir yağımlıq bulud ol, catlayan torpağıma
Mən səni qışdan qabaq, qardan, yağışdan qabaq,
min ildi ki bitməyən, bitsə də səs etməyən
soyuq savaşdan qabaq
Gözlədimee… gözlədim.
Yenə keçmərəm səndən, sonum ol, sonuncum ol!
Gəl başımın ağrısı, ürəyimdə sancım ol!
Hamı dağılsın getsin, sən yığış gəl birdənəm,
Ovucumun içinə, gözümün bəbəyinə,
Qollarım arasına, gəl, yığış gəl… birdənəm.
Deyim ki, nədi dərdim…
Sən gələnə ölmərəm… çalışaram ölmərəm.
… Gözümü yollarına, saçımı yastığına
İzimi torpağına səpərdimee səpərdim…
Səni mənə gətirən, bu həsrəti bitirən,
Ayağından, əlindən, dizlərindən öpərdim.
***
Mən dərdin dərd arısıyam
Dərddən dərd çəkirəm, ata
İçimdə hər gün Aşura
Hər gün qan tökürəm, ata.
Nə əlimdən bir iş gəlir
Nə dost gəlir, nə eş gəlir
Bax, evimə dərviş gəlir
Səcdəyə çökürəm, ata.
Sürgünə gəlmiş əsirdim
Həyat dərsindən kəsildim
Bir vaxt sənə tələsirdim
İndi gecikirəm, ata.
Tək yaşayıb, tək qalıram
Xəstə olub, sağalıram
Yollarına bağ salıram
Ağaclar əkirəm, ata.
***
Mən bu bəxti ha boyadım… olmadı
Bu nağıl da sona çatdı almasız
Mən gözlədim, kimsə aldı, apardı
Gizlənsəm də lap tanrının yanında
Bu dərd məni gözü yumlu tapardı
Düşün, bir də dönüşü yox bu yolun
İpin harda qırılacaq bilmirsən
Get… gedənlər karvanına qoşul get.
Anan çıxıb görəcək ki gəlmisən
Qucaqlayıb saçlarını ağlasa
Əlin qalxmaz gözlərini siləsən
Sığallayıb dizlərinin yarasın
Deyəcək ki “nələr gördün bala sən”
Deyərsən ki “yer yarıldı, göy düşdü”
Mən bu bəxti ha boyadım… olmadı
Bir boşluq ki oyuq-oyuq açıldı
Ha daşıdım, ha gətirdim, dolmadı.
***
Bir avqust səhəri soyuyub tamam
Buz tutdum, günəş də əritməz məni.
Elə kövrəlmişəm, elə qəmginəm
Qayıtsa anam da kiritməz məni..
Çıxıb bu dünyanın lap cızığından
Baxıb görmüşəm ki, o dünya yoxdu
Elə bilmişəm ki, azarlamışam
Üşüyür əllərim, əsir ayağım.
Sürgün yollarına, dustaq gözlərim
Girovdu əllərim, əsir ayağım
Baxıb görmüşəm ki, o dünya yoxdu
Avqustdu… bəs niyə mənə soyuqdu?
Bəs niyə heç kimin xəbəri yoxdu?
Çöldə külək əsir, çöldə tufandı..
Bəlkə də heç kimin xəbəri yoxdu
Tanrı bilir təkcə… mənim havamdı..
Bu dəli küləyin, qərib yağışın
Nəsə bildiyi var, nədisə demir
Bir avqust günündə,bu günəş altda
Qapan öz içinə, yığıl köksünə
Bürün taleyinə… sığın bəxtinə
Dişlə dodağını, qır barmağını
Dola saçlarını, qoluna dola
Did dağıt içini, özünü gəmir
Bu dəli küləyin dəli yağışın
Nəsə bildiyi var… nədisə demir.
Mən belə binədən üzü yolayam
Məni yollar doğub, yollar böyüdüb
Məni daş altında dağ çəkə-çəkə
Həsrət gəvələyib, kədər üyüdüb
Məni bu avqusta, bu soyuğa ver
Uzaq dur birdənəm… əlllərin donar
Bir də elə baxma, bir də danışma
Bir də qucaqlama saçımı elə
Birdə əllərimlə verib əl -ələ
Bir də qurban olum, danışma elə
Axı təzə-təzə soyuqlamışam
Söz vermə günəşi, vəd etmə daha
Uzaq dur, birdənəm əllərin donar
Bu avqust ayında belə havada
Adam ümid edər, adam inanar..
Daha nə ümidəm, daha nə arzu
Yoruldu bu ruhdan, sıxıldı bu can
Səni gözləyəcəm son gücüm ilə
Bu gündən avqustun axırınacan.
