Xəzər Universitetinin Humanitar, təhsil və sosial elmlər fakültəsinin Filologiya (Azərbaycan dili və ədəbiyyatı) ixtisası üzrə IV kurs tələbələri 2023-2024-cü tədris ilinin payız semestri çərçivəsində AMEA Folklor İnstitutunda Folklor elmi tədqiqat təcrübəsinə başlayıblar. Folklor elmi tədqiqat təcrübəsi filologiya ixtisası üzrə təhsil alan tələbələrin tədris prosesində əldə etdikləri nəzəri biliklərin müasir elmi yanaşmalar kontekstində tətbiqi, onlarda tədqiqatçılıq qabiliyyətlərinin formalaşdırılması məqsədilə həyata keçirilir. Elmi tədqiqat təcrübəsinə rəhbərlik edən AMEA Rəyasət Heyətinin elmi katibi Dos. Hikmət Quliyev filologiya fakültəsinin tələbələrini AMEA Folklor İnstitutunun baş direktoru, akademik Muxtar İmanovla tanış etdi. Akademik M.İmanov tələbələrə institutun elmi tədqiqat istiqamətləri, əldə olunan mühüm nailiyyətlər, dövri nəşrlər haqqında geniş məlumat verdi.
Sonra tələbələr Folklor İnstitutunun Türk xalqları folkloru şöbəsində oldular. Şöbənin müdiri, filologiya elmləri doktoru, professor Əfzələddin Əskər şöbənin digər əməkdaşlarının iştirakı ilə Türk xalqları folkloru şöbəsinin fəaliyyəti, aparılan tədqiqat yönləri, tərcümə sahəsində görülən mühüm işlər barədə tələbələrə məlumat verdi. Görüş zamanı tələbələri maraqlandıran mövzular, o cümlədən, folklorun toplanılması, akademik prinsiplər əsasında araşdırılması məsələləri müzakirə olundu.
khazar.org
