Sevgilim bütün beynəlxalq dillərdə danışır.
Bir sözlə, poliqlotdur.
Onunla tanış olmaq üçün nə qədər dil-dil ötdümsə xeyri olmadı.
Mənə məhəl qoyub bildiyi heç bir dildə cavab vermədi.
Bir gözəl gün bildiyi bütün dillərdə davranışımı qiymətləndirib,
qəlbində bildiyi bütün dillərdə məni sevdiyini söylədi və
bu sözləri gözləri ilə gözlərimə tərcümə etdi.
Sevgimiz dildən-dilə düşdü.
Bir dəfə də dilimi qarnıma qoymayıb qəlbinə dəydim.
Bildiyi bütün dillərdə məndən küsdü.
Bir parça dilimə yiyə çıxa bilmədiyim üçün bildiyi bütün dillərdə ağladı.
Bildiyi bütün dillərdə dil-ağız eləyib əfv dilədim.
Bildiyi bütün dillərdə susdu.
Bildiyi bütün dillərdə bircə dəfə gülümsəməsi üçün
dil tökməkdən dilimdə tük bitdi yenə də heç bir dildə dillənmədi.
Dildən düşsəm də onu dilə tutub ümumi dil tapa bilmədim.
Dilini bilmədiyim üçün yanında dilim qısa oldu.
Dilim qurudu heç kəsin yanında danışmağa dilim olmadı.
Axır bir gün ürəyim dilimin ucunda olanı deyib ağlıma ağıl qoydu.
Dilimi könlüm ilə bir edib ona bildiyi bütün dillərdə bir qızılgül bağışladım.
Sevgilim dilə gəlib bildiyi bütün dillərdə məni sevdiyini söylədi.
Mən də qəlbimdə “Ey dili qafil! ” deyib
Ona cani dildən sarıldım.
Dodaqlarımız bildikləri bütün dillərdə elə danışdılar ki, nə dil bildi, nə dodaq.
