(mənsur şeir)
Bir düşün, xəyal et körpə səsini, onun nəfəsini, xoş gülüşünü… Bu, sevgi deyilmi?
Günəşin doğuşu, çiçək qoxusu, yağışdan sonrakı torpaq qoxusu.. Sevgi deyilmi? Allaha açılmış dualı əllər, ruhları oxşayan həzin nəğmələr, illərdir yazılan saysız romanlar.., bəs bunlar necə, sevgi deyilmi?
Sevgini axtarma böyük şeylərdə. Sağ-solun sevgidir büsbütün… Görməyi bacarsan əgər. Gecə yuxundadır o, gündüz ağlında.
Hər şey sevgidən doğulmurmu bəs? Ən gözəl hisslər də, ən xoş anlar da…
Yaradan sevgini pay verib bizə. Qoruyaq sevgini şərdən, böhtandan,
Böyüdək sevgini özümüzlə bir…
